الفاضلة

بسم الله، كان يا مكان تاجر عندو وليِّد و بنيَّة. لبنيَّة أكبر من لوليِّد، نهار من نهارات مرض و حس روحو باش يموت عيِّط البنتو و قاللها: "يا عايشة ساعتي جات نحس في روحي باش نموت على قريب، رد بالك على خوك هاني خليتلكم الحانوت و في المقصورة تاو تلقى مخبيلكم جرة معبية بفلوس ذهب ما تقولش عليها الخوك حتى يكبر و يولي راجل." قاتلو ماتقولش هكا انشاله بطول لعمر. أما مات النهار الي بعدو و دفنوه. ثلاثة ولا اربعة سنين تعداو...
سئلت خوها نهار قاتلو كان نتسلف 100 دينار من عند جارتنا آش تعمل بيهم. قالها نشري بيهم حلوى و نفيخة و لعبة، قالت بينها و بين روحها مازال صغير

خوها ولا عمرو اربعطاش سنا، عاودت سئلتو قاتلو كان نتسلف ميات دينار من عند جارتنا آش تعمل بيهم. قالها نشري بيهم بيسيكلات. بعد ولا عمرو ثمنطاش سئلتو نفس السؤال قالها نعاود نحل حانوت بابا و نطيش السلعة الفاسدة و نبدى نخدم بِلِّي يصلح. قالت بينها و بين روحها توا خويا كبر. قاتلو مالا تاو نمشي نتسلفلك ميات دينار من عند جارتنا فاطمة و كيف تبدى تربح رجعهوملها.
بعد لا خرج مشات للمقصورة و جبدت من هاك الڨلة ميات دينار وسكرتها و رجعتها لبلاصتها، و كيف روح خوها مدتهالو.
النهار الي بعدو هز روحو و مشا لسوق، حل هانوت بوه و طيش السلعة الفاسدة من حرير و قطن و نظف و هوى الي يصلح و حطو للبيع. مشا التاجر في سوق صاحب بوه و سئلو باش يعلمو يتاجر. الراجل فرح بيه و هناه علي باش يعملو كيفاش موش باش يخلي صنعة بوه اتضيع. تعدى الوقت و فيسع ما ولا من احسن التجار في السوق، يخدم في برشا صناع. و بعد بمدة رجع لفلوس لختو

نهار و هو في الحانوت تعدى راجل في يدو بباغيو يتكلم و يحكي لحكايات يبيع فيه. قال بينو و بين روحو علاش ما ناخوشي لختي اوسعلها بالها و يونسها. خذاه و خذالو قفص ذهب معاه جرتين وحدى ذهب و وحدى فضة، وهزو روح بيه لختو. عبى الجرة لولا بماء الورد و الثانية بالزيوان. كل صباح بعد لا تكمل قضيتها تقعد بحذى البباغيو يحكيلها و يوسعلها في بالها.